Lífeyrissparnaður í Danmörku verður minni árið 2010 en árin þar á undan. Þegar á heildina er litið má ætla að Danir leggi alls 6 milljörðum danskra króna minna fyrir til efri áranna nú en í fyrra, samkvæmt upplýsingum frá Forsikring & Pension.

Franska ríkisstjórnin ætlar að hækka eftirlaunaaldur og skattleggja hátekjur sérstaklega til að stuðla að því að lífeyriskerfi landsmanna standi undir sér.  Frakkar geta farið á eftirlaun við sextugsaldur en nú boða stjórnvöld að eftirlaunaaldur hækki í áföngum í 62 ár til 2018.

Umsvif á fasteignamarkaði í Evrópu jukust enn frekar á öðrum fjórðungi ársins, á sama tíma og óvissu gætir í röðum fjárfesta vegna mikillar skuldabyrði ríkissjóða í álfunni. Upplýsingar hafa birst frá bæði Cushman & Wakefield and DTZ um aukna veltu í fasteignaviðskipum, á bilinu 11-19% miðað við fyrsta ársfjórðung.

Þjóðir heimsins eldast og öldrunin skapar þrýsting á ríkisstjórnir og fyrirtæki vegna sívaxandi fjárþarfar lífeyris- og heilbrigðiskerfa til lengri tíma. Þá fækkar vinnandi fólki hlutfallslega en eftirlaunaþegum fjölgar að sama skapi. Það að fólk lifir lengur en áður skapar þannig ákveðna ógn fyrir lífeyriskerfin og fyrirtækin sem undir þeim standa.

Efnahagsstofnunin í París, OECD, reiknar út hlutfall vinnandi fólks og eftirlaunamanna (65 ára og eldri) nú og í framtíðinni til að sýna fram á lýðfræðilega þróun samfélaga heimsins næstu áratugi. Þar koma margir þætti við sögu, einkum þó dánarlíkur, fæðingarlíkur og búferlaflutningar.

Fjármálaeftirlit Noregs hefur heimilað vogunarsjóðum að starfa og markaðssetja sig gagnvart stofnanafjárfestum þar í landi en sjóðirnir verða áfram að halda sig frá einstaklingum og öðrum slíkum fjárfestum.

Nú er það vísindalega sannað sem margan hefur grunað: létt lund lengir lífið! Fullyrðinguna á má reyndar líka orða sem svo að lífsgleði fjölgi fólki sem kemst á eftirlaunaaldur. 
Þetta er niðurstaða umfangsmikillar rannsóknar í Norður-Þrændalögum í Noregi, sem stóð yfir í sjö ár og tók til yfir 53.000 manns. Það bendir sem sagt flest til þess að lífsgleði og gott skap hafi jákvæð áhrif á heilsufar og félagslíf, sem stuðlar bæði að því að lengja æviskeiðið og létta fólki ævikvöldið.

Heildarsamtök atvinnurekenda og launamanna í Hollandi sömdu 7. júní s.l. um að hækka eftirlaunaaldur úr 65 í 66 ár 2020, í ljósi þess að lífslíkur Hollendinga hafa aukist líkt og flestra annarra þjóða sem búa við þokkalega velmegun. Jafnframt felst í samkomulaginu að endurskoða skuli á fimm ára fresti hvort eftirlaunaaldur skuli hækka enn frekar.

Hjálparstofnun kirkjunnar í Noregi fer fram á að stjórnvöld þar í landi rannsaki þegar í stað hvort eitthvað sé hæft í því að olíufélög, sem eftirlaunasjóður norska ríkisins, Olíusjóðurinn svokallaði, á eignarhluti í, tengist stríðsglæpum í Afríkuríkinu Súdan á árunum 1997 til 2003. Stofnunin beinir því jafnframt til ríkisstjórna Svíþjóðar, Malasíu og Austurríkis að kanna það sem að þeim snýr í málinu.

Olíumengunarslysið mikla á Mexíkóflóa hefur orðið tilefni umræðna meðal fjárfesta í röðum lífeyrissjóða um fjárhagslega áhættu tengda starfsemi af þessu tagi. Það er ekki aðeins gengislækkun hlutabréfa í BP-olíufélaginu sem veldur mönnum áhyggjum heldur ekki síður ímyndarskaðinn sem olíuhneykslið skapar.

Um þrjár milljónir Breta, 45 ára og eldri, munu neyðast til að fresta starfslokum vegna kreppu og fjárhagsörðugleika eða til þess að safna meiri lífeyri, segir í skýrslu breska trygginga– og lífeyrissjóðafyrirtækisins Prudential.

Nýjar rannsóknir Prudential benda til þess að 9% Breta muni fresta starfslokum vegna fjárhagslegra aðstæðna og áhrifa kreppunnar og að 7% muni fresta starfslokum til þess að auka við lífeyrissparnað sinn. Af þeim, sem hafa ákveðið að fresta starfslokum, óttast fjórði hver svarandi að hann muni aldrei hafa efni á að hætta alveg störfum vegna þess að kreppan hafi haft svo slæm áhrif á lífeyrissparnað viðkomandi, samkvæmt rannsókn Prudential: Class of 2010.